सिरहाको नरहा गाउँपालिका–१ देविपुरमा राहतको विषयमा नेकपा र कांग्रेसका कार्यकर्ताबीच भएको झडपमा गोली चलेको छ। झडपमा डेढ दर्जन व्यक्ति घाइते भएका छन् । घाइतेमध्ये ३ जनालाई उपचारका लागि विराटनगर पठाइएको छ भने अन्यको सिरहा अस्पतालमा उपचार भइरहेको प्रहरीले जनाएको छ । 

एक पक्षिय रुपमा राहत बाँडेको भन्दै कांग्रेस र समाजवादीका कार्यकर्ता प्रदर्शनमा उत्रिएका थिए। उनीहरुमाथि नेकपाका वडाध्यक्ष पक्षले गोली चलाएको बिपक्षीले आरोप लगाएका छन् । 

नरहा गाउँपालिकाका अध्यक्ष रामशरण यादवले राहतको विषयमा आफ्ना वडाध्यक्षमाथि कांग्रेस र समाजवादीका कार्यकर्ताले आक्रमण गरेपछि गोली चलेको बताए।

प्रहरीले भने २ पक्षीय झडपमा केही व्यक्ति घाइते भए पनि गोली चलेको वा नचलेकोबारे अहिले पुष्टि हुन नसकेको बताए । ‘गोलीको हल्ला छ, तर पुष्टि भएको छैन,’ सिरहाका प्रहरी नायब उपरीक्षक विनोद घिमिरेले भने । घटना विषयमा अनुसन्धान भइरहेको घिमिरेले समेत बताए ।

कांग्रेसका कार्यकर्ताले वडाध्यक्षसँगै रहेका उपमेयरका छोरा अरविन्दले गोली चलाएको आरोप लगाएका छन् ।