उच्च अदालत पाटनका न्यायाधीश मात्रिकाप्रसाद मरासिनीको हृदयाघातका कारण निधन भएको छ । 

मंगलबार बिहान हृदयाघातका कारण ५६ वर्षीय न्यायाधीश मरासिनीको निधन भएको हो । काठमाडौंको कलंकीमा बस्दै आएका मरासिनी पेशी तय भएपछि कार्यालय आउने तयारी गरिरहेका बेला बिहान ९ बजे घरमा बसिरहेका बेला समस्या आएको थियो । लगत्तै उनलाई उपचारका लागि कलंकीस्थित नेसनल अस्पतालमा भर्ना गरिएको थियो ।

उपचारका क्रममा बिहान १० बजे निधन भएको पाटन उच्च अदालतका प्रवक्ता तीर्थ भट्टराईले जानकारी दिए। 

२०२४ जेठ २८ गते स्याङ्जामा जन्मिएका उनी २०५० साउन १ गते न्याय सेवामा प्रवेश गरेका थिए । उनी २०७० जेठ २७ गते जिल्ला न्यायाधीश नियुक्त भएका थिए ।

न्यायाधीश मरासिनी सरुवा भएर दुई दिनअघि मात्रै पाटन उच्च अदालत हाजिर भएका थिए ।