नेकपा एमालेनिकट अनेरास्ववियुले त्रिभुवन विश्वविद्यालयको उपकुलपतिका लागि शुक्रबार भएको विज्ञापनमा आपत्ति जनाएको छ ।

अनेरास्ववियुका अध्यक्ष समिक बडालले आज एक विज्ञप्ति जारी गर्दै उपकुलपतिका लागि प्रकाशित विज्ञापनमा विश्वविद्यालयको पदाधिकारीमध्ये कुनै एक पदमा ३ वर्ष काम गरेकोले आवेदन दिन पाउने भन्ने प्रावधानले योग्य व्यक्तिहरुलाई खुला प्रतिस्पर्धाबाट बञ्चित गराउने  बताएका छन् ।

अहिले प्रकाशित गरिएको विज्ञापनको सर्तअनुसार खुला प्रतिस्पर्धाबाट उपकुलपति नियुक्त हुन नसक्ने अनेरास्ववियुको दाबी छ । 

विज्ञप्तिमा भनिएको छ  ‘पुनः विश्वविद्यालयमा राजनीतिक स्वार्थ हावी हुन दिने वर्तमान गठबन्धन सरकारको मनशाय रहेको स्पष्ट हुन्छ । यस घटनाक्रमले प्रधानमन्त्रीको त्रिभुवन विश्वविद्यालय सुधार गर्ने भन्ने अभिव्यक्ति जनताको आँखामा छारो हाल्ने काम मात्र भएको प्रमाणित भएको छ ।’ 

साथै अनेरास्ववियुले प्रधानमन्त्री कुलपति रहने, शिक्षामन्त्री सहकुलपति हुने व्यवस्था खारेज गरी बोर्ड अफ ट्रष्टी बनाउनुपर्ने माग गरेको छ ।