जय ट्रफीको चौथो खेल बागमती प्रदेश र त्रिभुवन आर्मी क्लबले ड्र खेलेका छन् । बिहीबार जनकपुरमा खेलको दोस्रो दिन जितका लागि बागमतीले २०४ रनको लक्ष्य पाएको थियो । तर, बागमतीले दोस्रो पारीमा अन्तिम दिनको खेल सकिँदा ५ विकेटमा ८० रन मात्र बनायो । त्यसपछि खेल ड्र भएको हो । 

रेड बल क्रिकेटको पहिलो पारीमा आर्मीले ५ विकेटमा २७६ रन बनाएको थियो भने दोस्रो पारीमा ८ विकेटमा १२७ रन बनायो । बागमतीले पहिलो पारीमा २०० रन बनाएको थियो । उसले दोस्रो पारीम ५ विकेटको क्षतिमा ८० रन बनाएको थियो । 

आर्मीका लागि पहिलो पारीमा इमरान शेखले ७२ र बसिर अहमदले नटआउट ५३ रन बनाएका थिए । दोस्रो पारीमा तृतराज दासले सर्वाधिक २८ रन बनाए । बागमतीका विपिन आचार्यले पहिलो पारीमा ३ विकेट लिएका थिए । दोस्रो पारीमा नन्दन यादवले ४ विकेट लिए । 

आर्मीका आकाश चन्दले पहिलो पारीमा ३ र दोस्रो पारीमा २ विकेट लिए । बिहीबार हरेक टिमले दुई दुई खेल खेल्दा मधेशलाई पराजित गरेको पुलिस क्लब शीर्ष स्थानमा छ भने दोस्रो आर्मी, तेस्रो बागमती र चौथोमा मधेश प्रदेश छ । चार टिम सहभागी खेलमा शीर्ष दुई टिमबीच फाइनल खेल हुनेछ । साझेदारी, अर्धशतक, शतक र जित तथा चार विकेट र पाँच विकेटको समेत बोनस अंक दिइने भएकाले सबै टिमले अंकतालिकामा अंक जोडेका छन् । अब हरेक टिमले एक एक खेल खेल्न बाँकी छ । 

शिलापत्र