नेपालमा पछिल्लो २४ घण्टाको अवधिमा थप १०९ जनामा कोरोना भाइरस (कोभिड-१९) संक्रमण पुष्टि भएको छ ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार पछिल्लो २४ घण्टाको अवधिमा देशभरका विभिन्न प्रयोगशालामा गरिएको परीक्षणमा थप १०९ जनामा कोरोना संक्रमण पुष्टि भएको हो । योसँगै देशभर अहिलेसम्म कूल कोरोना संक्रमितको संख्या १८ हजार ४८३ पुगेको छ ।

आज देशभर सक्रिय संक्रमितको संख्या ५ हजार ३८५ रहेको छ । उनीहरूको देशभरका विभिन्न आइसोलेसन सेन्टरमा उपचार भइरहेको मन्त्रालयले जनाएको छ ।

त्यस्तै शनिबार थप १०६ जनाले कोरोना संक्रमणलाई जितेर घर फर्किएका छन् । अहिलेसम्म कोरोना भाइरस संक्रमणमुक्त भएर घर फर्किनेको संख्या १३ हजार ५३ पुगेको मन्त्रालयले जनाएको छ । नेपालमा कुल संक्रमितमध्ये ७०.०६ प्रतिशत निको भएको प्रवक्ता डा. गौतमले बताए ।