काठमाडौं उपत्यकामा १५ दिनका लागि अत्यावश्यक बाहेकका सेवा बन्द गरिने भएको छ । आज बसेको काठमाडौं, भक्तपुर र ललितपुर जिल्लाका प्रमुख जिल्ला अधिकारीहरूको बै‌ठकमा१५ दिनसम्म अत्यावश्यक बाहेकका सेवाहरू बन्द गर्ने सहमती भएको हो ।

काठमाडौंका प्रमुख जिल्ला अधिकारी जनकराज दाहालले अत्यावश्यक बाहेकका सेवा बन्द गर्नेबारे तीनै जिल्लाका अधिकारीहरूबीच सहमति भइसकेको जानकारी दिए ।

उपत्यकामा कोरोना भाइरस संक्रमितको संख्या बढ्दै गएपछि जोखिमलाई न्यूनीकरण गर्नका लागि शान्ति सुरक्षा अत्यावश्यक सेवा बाहेकका सेवा १५ दिन बन्द गर्ने सहमति गरेको हो ।

पछिल्लो समय काठमाडौं उपत्यकामा सरकारी कार्यालय, सुरक्षा निकाय तथा बैंकको कर्मचारीहरूमा संक्रमण बढ्दै गएको छ । संक्रमणको दर बढेको र त्यसमा पनि सरकारी कार्यालयहरूमा बढी देखिन थालेपछि यस्तो सरकारले उच्च सुरक्षा सतर्कता अपनाउन भनेको छ ।