सत्तारूढ दल नेपाल कम्युनिस्ट पार्टी (नेकपा) सचिवालय बैठक स्थगित भएको छ । कोरोना भाइरसको संक्रमण बढ्दै गएपछि शनिबारका लागि बोलाइएको सचिवालय बैठक स्थगित भएको हो ।

बैठक आगामी १८ भदौ बस्ने गरी बैठक स्थगित भएको हो । सचिवालय सदस्यसमेत रहेका नेताका सहयोगीमा कोरोना संक्रमण पुष्टि भएपछि नेताहरू आइसोलेसनमा रहेका कारण बैठक स्थगित भएको नेकपाले जनाएको छ ।

गत मंगलबार अध्यक्षद्वय केपी शर्मा ओली र पुष्पकमल दाहाल (प्रचण्ड)बीचको छलफलपछि शनिबार सचविालय बैठक बोलाउने सहमति भएको थियो ।

नेकपाको आन्तरिक विवाद समाधान गर्न गत ३० साउन महासचिव विष्णु पौडेलको संयोजकत्वमा गठित ६ सदस्यीय कार्यदलले ६ भदौमा समाधानको सूत्रसहति १७ पेज लामो प्रतिवेदन बुझाएको थियो । 

नेकपाले त्यही प्रतिवेदनमाथि छलफल गर्न शनिबार सचिवालय बैठक बोलाएको थियो । सचिवालय बैठकपछि कार्यदलले बुझाएको प्रतिवेदनबारे स्थायी कमिटीको बैठकमा छलफल गर्ने तयारी थियो ।