प्रदेश २ को प्रदेशसभाले प्रदेश २ को नाम मधेश प्रदेशको प्रस्ताव पारित गरेको छ । सोमबार बसेको प्रदेशसभाको दुई तिहाइबाट मधेश प्रदेश प्रस्ताव पारित भएको हो ।

१०३ सदस्य भएको प्रदेशसभाको दोस्रो बैठकमा भएको मतदानमा ९९ सांसद सहभागी भएका थिए, जसमध्ये ८० जनाले पक्षमा मत दिए । जसपाको ३९, माओवादीका ८ र लोसपाको १६ गरी ६३ जना सांसद थिए । नेपाल संघीय समाजवादी पार्टीले पनि यसमा समर्थन जनाएको थियो ।अरु दलका १६ सांसदले पनि प्रदशेको नाम मधेश राख्ने प्रस्तावको पक्षमा मतदान गरेका छन् ।

मधेश नाम स्वीकृत भएपछि अब अन्य नाम स्वतः निष्कृय भएको सभामुख सरोज कुमार यादवले जानकारी दिए ।

मधेश प्रदेश रहने प्रस्ताव जनता समाजवादी, माओवादी केन्द्र र लोसपाले गरेको थियो ।

यसअघि प्रदेशसभाको पहिलो बैठकमा राजधानीका लागि भएको मतदानमा जनकपुर राजधानी प्रस्ताव दुई तिहाइ बहुमतले पारित भएको थियो।

जनकपुर राजधानीको पक्षमा उपस्थित ९९ जना प्रदेश सभा सदस्यमध्ये ७८ जनाले पक्षमा मतदान गरेका थिए भने २१ जनाले विपक्षमा मतदान गरेका थिए।