हिजो बुधबार रुसको बेलगोरोद क्षेत्रमा एउटा रुसी सैन्य विमान दुर्घटनामा पर्दा त्यसमा ६५ युक्रेनी युद्धबन्दीसहित ७४ जनाले ज्यान गुमाए । बेलगोरोदका क्षेत्रीय गभर्नर भ्यास्चेस्लाभ ग्लादकोभका अनुसार रुसी इल–७६ विमान दुर्घटनामा परेको हो ।

तर, यो दुर्घटना नभएर युक्रेनी नागरिकको हत्या गर्ने रुसी प्रपञ्च भएको युक्रेनी आशंका छ । रुसका अनुसार ती युक्रेनी युद्धबन्दीहरू रुसी युद्धबन्दीहरूसँग आदानप्रदान गरिँदै थिए, तर दुर्भाग्यवश विमान दुर्घटनामा सबै मारिए । 

युक्रेनका राष्ट्रपति भोलोदिमिर जेलेन्स्कीले यस घटनापछि रुसले युक्रेनी बन्दीहरूको जीवनमाथि खेलवाड गरेको प्रतिक्रिया जनाएका छन् । उनी यो घटना दुर्घटना हो भनेर पत्याउन तयार छैनन् । राष्ट्रपति जेलेन्स्कीले भनेका छन्, ‘यो स्पष्ट छ कि रुसीहरूले युक्रेनी कैदीहरूको जीवन, उनीहरूका आफन्तहरूको भावना र हाम्रो समाजको भावनासँग खेलिरहेका छन् ।’

रुसी सांसद आन्द्रे कार्तौपोलोभले भने युक्रेनले तीनवटा क्षेप्यास्त्र हानेर उक्त विमान खसाएको दाबी गरेका छन् । उनले आफ्नो भनाइलाई पुष्टि गर्न प्रमाण भने पेस गरेका छैनन् ।