कर्णालीका हिमाली जिल्लाहरूमा वर्षा र हिमपात भइरहेको जल तथा मौसम विज्ञान विभागको मौसम पूर्वानुमान महाशाखाले जनाएको छ ।

महाशाखाका अनुसार हाल नेपालमा पश्चिमी वायुको प्रभाव छ । त्यसको प्रभावले सुदूरपश्चिम प्रदेशका धेरै स्थानहरूमा, कर्णाली प्रदेशका थोरै स्थानहरूमा र लुम्बिनी प्रदेशको एक–दुई स्थानमा फाटफुटदेखि हल्का वर्षा भैरहेको हो ।

हुम्ला, डोल्पा, मुगु र जुम्लामा गत रातिबाट हिमपात र वर्षा सुरु भएको हो । यी जिल्लाहरूमा हल्का हिमपात र बेसीमा वर्षा भइरहेको छ ।

मुगुको रारा, मुर्मा, चंखेली, बाम, सोभा, घुच्चीलेक, मुन्दु र माथितुम क्षेत्रमा पनि हल्का हिमपात भएको जिल्ला प्रशासन कार्यालय मुगुका प्रमुख जिल्ला अधिकारी टोपेन्द्र बहादुर केसीले जानकारी दिए । उनका अनुसार मुगुम कार्मारोङ गाउँपालिकाको माथिल्लो क्षेत्र मुगु , डोल्फू, किम्री, क्षेत्रमा पनि गए रातिदेखि पनि हल्का हिमपात भएको बताए । यस्तै, जुम्ला सदरमुका खलङ्गामसहित जिल्लाभर करिब आधा फिट हिउँ जमेको छ । ढिलोगरी हिमपात भएपछि हिउँदै बाली लगाएर आकाशे पानीको पर्खाइमा रहेका किसानलाई केही राहत भएको छ ।

माघ लाग्दा पनि हिउँ नपरेपछि खडेरी लाग्ने हो कि भन्ने किसान चिन्तामा थिए । जौ र गहुँबाली लगाएका किसान भने यो हिउँले निकै राहत भएको कृषि विकास कार्यालयले जनाएको छ । स्याउ र ओखरका बिरुवा रोप्ने याम आएकाले हिउँले सहज हुने कृषि उद्यमी गोपाल रोकायाको भनाइ छ । जुम्लालगायत माथिल्लो कर्णालीमा हिमपात भएसँगै हवाई सेवा अवरुद्ध भएको छ ।

हरेक वर्ष हिउँदमा हिमपात हुने जिल्लामा यस वर्ष भने ढिलो हिउँ पर्ने सुरु भएको हो ।