प्यालेस्टाइनी विद्रोही समूह हमासको नियन्त्रणमा रहेको ठानिएका नेपाली विद्यार्थी विपिन जोशीको रिहाइबारे इजरायलका राष्ट्रपतिसँग नेपाली राजदूतले टेलिफोन संवाद गरेका छन् ।

इजरायलस्थित नेपाली राजदूत धनप्रसाद पण्डितले इजरायलका राष्ट्रपतिसँग विपिनको रिहाइबारे टेलिफोन संवाद गरेको परराष्ट्र मन्त्रालयले विज्ञप्ति जारी गरेर जानकारी दिएको छ ।

मन्त्रालयका अनुसार संवादका क्रममा राष्ट्रपति हर्जोगले इजरायलले नेपाली विद्यार्थी जोशीसहित हमासले बन्धक बनाएकाहरूको उद्धारका लागि सबै प्रयासहरू लगाइरहेको बताएका थिए ।

इजरायल र हमासबीच युद्धविराम भएयता बन्धक र कैदी आदानप्रदान भइरहेको छ । तर, जोशी अहिलेसम्म रिहा हुने सूचीमा अटाएका छैनन् ।

नेपालले कूटनीतिक पहल भने जारी राखेको छ । हालै इजरायलले जुनसुकै बेला विपिनको रिहाइ हुन सक्ने भन्दै तयारी हालतमा रहन इजरायलस्थित नेपाली दूतावासलाई खबर दिएको थियो ।

हमासले इजरायलमा आक्रमण गर्ने क्रममा नेपाली विद्यार्थी जोशी अपहरणमा परेका थिए । उनीसँगै रहेका १० नेपाली विद्यार्थीको भने हमासको आक्रमणमा ज्यान गएको थियो ।