काठमाडौं, बैशाख १२ गते शुक्रबार । सरकारले विवादित दुवै अध्यादेश फिर्ता लिने निर्णय गरेको छ ।

वैशाख ८ गते जारी गरेको दल विभाजनको प्रावधान खुकुलो बनाउने र संवैधानिक परिषद्‍सम्बन्धी अध्यादेश फिर्ता गर्ने निर्णय शुक्रबारको मन्त्रिपरिषद् बैठकले गरेको हो । सरकारले पारित दुवै अध्यादेश फिर्ता लिने निर्णय गरेको १ मन्त्रीले जानकारी दिए ।

अध्यादेशको चौतर्फी विरोध भएपछि बिहीबार पार्टी नेतासँगको भेटमा प्रधानमन्त्री केपी शर्मा ओलीले अध्यादेश फिर्ता लिने संकेत गरेका थिए । पार्टीभित्र छलफल नगरी अध्यादेश ल्याएपछि प्रधानमन्त्री ओली घेराबन्दीमा परेका थिए ।

दुवै अध्यादेश राष्ट्रपति विद्यादेवी भण्डारीबाट प्रमाणीकरण भएर जारी भइसकेका छन् । मन्त्रिपरिषद्ले दुवै अध्यादेश खारेज गर्नका लागि राष्ट्रपतिलाई सिफरिस गर्ने निर्णय गरेको हो ।